Agile მეთოდოლოგიით მომუშავე კომპანიების უმეტესობა Scrum-ის მეთოდზე აკეთებს არჩევანს. ეს მეთოდი განსაკუთრებით პოპულარულია IT და software დეველოპმენტის სფეროში. თუმცა მას აქტიურად იყენებენ სხვა არაერთდ ინდუსტრიაში, იქნება ეს ფინანსური ინსტიტუტები, მონაცემთა ანალიტიკა, ფარმაცია, ტელეკომუნიკაციები, განათლება, სატრანსპორტო თუ სამთავრობო დაწესებულებები.

ამ მეთოდს მიმართავენ ცნობილი დიდი კომპანიებიც: Google, Facebook, Apple, Yahoo, Netflix, Spotify, Amazon, Adobe და სხვა. აღნიშნულ სტატისტიკას კი რამდენიმე მნიშვნელოვანი ფაქტორი განაპირობებს, რომლებიც Scrum-ს სხვა Agile მეთოდებისგან გამოარჩევს:

1. მოქნილობა და ადაპტაცია – ამ მეთოდის გამოყენებისას გუნდისთვის მარტივია ცვლილებებზე სწრაფი რეაგირება. ეს განსაკუთრებით მნიშვნელოვანია ინფორმაციული ტექნოლოგიების სფეროში, სადაც მოთხოვნები ხშირად იცვლება. მოქნილი სტრუქტურა ხელს უწყობს ახალ პირობებთან სწრაფად ადაპტაციასა და მიმდინარე გამოწვევების ეფექტურ მართვას;

2. ეფექტური კომუნიკაცია – Scrum-ს აქვს მკაფიო სტრუქტურა, რომელიც ხელს უწყობს გუნდის წევრებს შორის მუდმივ და ღია კომუნიკაციას. ყოველდღიური Stand-up შეხვედრები და რეგულარული უკუკავშირი უზრუნველყოფს გუნდის სინქრონიზაციას და კოორდინაციას. ეს კი ამცირებს გაუგებრობებს და აჩქარებს პრობლემების გადაჭრის პროცესს;

3. ფოკუსი მომხმარებლის საჭიროებებზე – Scrum გუნდი რეგულარულად იღებს მომხმარებლის უკუკავშირს, რაც ზრდის საბოლოო პროდუქტის ხარისხსა და რელევანტურობას. მომხმარებელთან მუდმივი კომუნიკაცია და პრიორიტეტების დროული გადახედვა უზრუნველყოფს, რომ საბოლოო პროდუქტი სრულად პასუხობდეს მის მოთხოვნებსა და ბიზნეს საჭროებებს.

4. პროდუქტიულობის ზრდა – ამ მეთოდის სტრუქტურა ხელს უწყობს გუნდების ორგანიზებულობასა და უფრო ეფექტურად მუშაობას, რაც საბოლოოდ ამცირებს პროექტის დასრულების ვადებს და ზრდის პროდუქტიულობას. ხოლო დროის მართვის მკაფიო პრინციპები და პრიორიტეტების სწორად განსაზღვრა უზრუნველყოფს სამუშაო პროცესების ოპტიმიზაციას;

5. გამჭვირვალობა და ანგარიშვალდებულება – Scrum-ის პროცესები გამჭვირვალეა გუნდის ყველა წევრისთვის, რაც ხელს უწყობს ინდივიდუალურ და გუნდურ პასუხისმგებლობას. თითოეული გუნდის წევრმა ზუსტად იცის საკუთარი როლი და პასუხისმგებლობა, რაც ამცირებს გაურკვევლობას და ზრდის შესრულების ხარისხს;

6. ინოვაციის ხელშეწყობა – Scrum ქმნის გარემოს, სადაც გუნდები უფრო თავისუფლად მოქმედებენ და ატარებენ ერთგვარ ექსპერიმენტებს, რაც ზრდის ინოვაციური იდეების განვითარების შესაძლებლობებს. მუდმივი გაუმჯობესებისა და ახალ მიდგომებზე ორიენტაციის გამო, ეს მეთოდი განსაკუთრებით პოპულარულია ისეთ სფეროებში, სადაც კონკურენტუნარიანობა და კრეატიულობა უმნიშვნელოვანესია.