რეკლამას ერთი უცნაურობა ახასიათებს – როგორც წესი, ვცდილობთ თავი ავარიდოთ მას, დავბლოკოთ, “დავსკიპოთ”, მეორე მხრივ კი შეიძლება მოუთმენლად ველოდებოდეთ საყვარელი ბრენდის ახალ კამპანიას და სიამოვნებით ვუყურებდეთ მაგალითად Nike-ის რგოლებს, McDonald’s-ის და Burger King-ის ორთაბრძოლებს, Coca-Cola-ს საახალწლო ქარავანს. როდის ხდება რეკლამა გასართობი და არა შემაწუხებელი? როგორ ახერხებს ამას ზოგიერთი ბრენდი? რა დგას ეფექტური სარეკლამო კამპანიის უკან? კურსის ფარგლებში ვეცდებით ამ კითხვებზე პასუხების პოვნას. 

ლექციებზე მიმოვიხილავთ სარეკლამო კომუნიკაციის საფუძვლებს, ძირითად პრინციპებს, ინსტრუმენტებს. გავეცნობით კრეატიული სააგენტოს მუშაობის მექანიკას, მოვალეობებსა და დამკვეთთან ჰარმონიულად ურთიერთობის წესებს. გავაანალიზებთ და განვიხილავთ გლობალურ თუ ქართულ ქეისებს. 

სტუდენტებს საშუალება ექნებათ შეიხედონ სარეკლამო ინდუსტრიის შიდა სამზარეულოში და გამოიმუშაონ კამპანიის დაგეგმვის, კრეატივის შეფასების და კრეატიულ გუნდთან მუშაობის მენეჯერული უნარ-ჩვევები.

კურსი განკუთვნილია მათთვის, ვინც ახლა ირჩევს პროფესიას და აინტერესებს სარეკლამო ინდუსტრიაში მუშაობა ან ნებისმიერი სხვა პროფესიის ადამიანისთვის, ვისაც ამ მიმართულებით სურს პროფესიის შეცვლა. კურსი სასარგებლო იქნება დამწყები მარკეტერის, ბრენდის/პროექტის მენეჯერის ან ექაუნთ მენეჯერისთვის. ასევე სტარტაპერისთვის, ვისაც საკუთარი კომპანიის სამართავად სჭირდება ზოგადი ცოდნა კომუნიკაციის და სააგენტოსთან/გარე რესურსებთან მუშაობის შესახებ. 

მნიშვნელოვანია, სტუდენტმა იცოდეს ინგლისური ენა იმ დონეზე, რომ შეძლოს ინგლისურენოვანი ქეისების განხილვა/გააზრება.

კურსი მოიცავს პრაქტიკაზე დაფუძნებულ სწავლებას, რაშიც იგულისხმება დავალებები / სავარჯიშოები და ინდივიდუალური პროექტი.

პროგრამის განმავლობაში მიიღებ რჩევებსა და კონსულტაციებს კარიერული დაგეგმვის კუთხით. მისი წარმატებით დასრულების შემთხვევაში კი გექნება კარიერული მხარდაჭერა Commschool-ის პარტნიორი კომპანიებისგან, რაც გამოიხატება ექსკლუზიურ სამუშაო შემოთავაზებებსა და სტაჟირებაში.

კურსის წარმატებით დასრულების შემდეგ სტუდენტი მიიღებს ორენოვან სერტიფიკატს.