9 აპლიკაცია პროდუქტიულობის გასაზრდელად

კოდის წერის სწავლა დიდ დროსა და ძალისხმევას მოითხოვს. მოტივაციის შენარჩუნება კი ზოგჯერ რთულია, რაც შემდგომ პროდუქტიულობაზეც აისახება. ასევე მნიშვნელოვანია ორგანიზებულობის შენარჩუნებაც, რომელიც გეხმარება, ფოკუსირდე მთავარ საქმეზე და შეძლო ნაყოფიერად მუშაობა.

თუ პროდუქტიულობის შენარჩუნება შენთვისაც გამოწვევაა, მაშინ ამ ბლოგს გაეცანი. აქ აღმოაჩენ იმ აპლიკაციებს, რომლებსაც დეველოპერები ყველაზე ხშირად მიმართავენ ყოველდღიური საქმის ეფექტური ორგანიზებისთვის.

1. Notion

Notion საუკეთესო პლატფორმაა, სადაც ცოდნის ბაზის განთავსება შეგიძლია. მრავალი დეველოპერი დოკუმენტაციის ორგანიზებისა და გაზიარებისთვის იყენებს. გამოსადეგია კოდის ნაწყვეტების, საუკეთესო პრაქტიკების, პროექტის მოთხოვნების, ხარვეზების ამოფხვრის გზების განსათავსებლად. ასევე, შესაძლებელია მისი გამოყენება შეხვედრების დროს მნიშვნელოვანი ინფორმაციის, მითითებებისა თუ შენიშვნების ჩასაწერად, რომლებსაც გუნდის წევრებსაც გაუზიარებ.

2. Unroll.me

ელექტრონული ფოსტის უკეთესად სამართავად Unroll.me საუკეთესო გამოსავალია. იგი დაგეხმარება, გააუქმო გამოწერა ყველა არასაჭირო და არასასურველ ავტომატურ მეილებს. მათი გაცხრილვით დაზოგავ დროსა და ენერგიას.

3. Akiflow

ამ პლატფორმაზე სხვადასხვა დეველოპერული ხელსაწყოების გაერთიანებას შეძლებ (მაგალითად, GitHub და Jira). Akiflow-ის გამოყენებით შექმნი ერთ საერთო სივრცეს მათთვის და მარტივად შეძლებ მათ მართვას. აქ შეგიძლია გააერთიანო ყველა ის ორგანიზაციული აპლიკაცია, რომელსაც შენი გუნდი იყენებს: GitHub, Jira, Zoom. შედეგად, აღარ მოგიწევს სხვადასხვა აპლიკაციის ცალ-ცალკე შემოწმება დავალებებისა თუ სიახლეების გასაგებად.

4. Structured

შესასრულებელი გეგმისა და კალენდრის ვიზუალიზაციისთვის Structured სცადე. ეს აპლიკაცია დაგეხმარება ორგანიზებულობის შენარჩუნებაში. აქ შეგიძლია შექმნა შენი განრიგი სწორხაზოვანი ფორმატით, რომელიც მარტივს ხდის დავალებების მეთვალყურეობას. ასევე შეგიძლია ჩააშენო კალენდარი და დააყენო შეტყობინებები შესასრულებელი დავალების შესახსენებლად.

5. Routinery

ეს პლატფორმა საუკეთესოა სწავლის ჩვევების ჩამოსაყალიბებლად. თუკი გსურს, რომ სწავლა შენი ყოველდღიურობის ნაწილი გახადო, ეს აპლიკაცია გამოიყენე. მისი დახმარებით შეადგენ დილისა და საღამოს რუტინას. აპლიკაცია დააყენებს ტაიმერს და შეგახსენებს შემდგომ ეტაპებს. ეს კი ხელს შეუწყობს თანმიმდევრულობასა და ჩვევების ჩამოყალიბებას.

6. Asana

მიზნების დასახვასა და მათკენ სწრაფვაში ეს პლატფორმა შენი საუკეთესო მეგზური იქნება. Asana-ს არაერთი ორგანიზაცია თუ ტექ. გუნდი იყენებს, რადგან მისი დახმარებით ეფექტურად არის შესაძლებელი პროექტის გრაფიკის მართვა და კომპანიის სხვადასხვა დეპარტამენტების თანამშრომლობა. შენ კი შეგიძლია დროში გაწერილი მიზნების განსაზღვრა, იქნება ეს პროექტთან თუ სწავლასთან დაკავშირებული.

7. Todoist

სამსახურისა და პირადი ცხოვრების ბალანსის დაცვაში Todoist დაგეხმარება. აქ ერთ სივრცეში შეგიძლია მოაქციო დღის განმავლობაში შესასრულებელი ყველა ის დავალება თუ საქმე, რომელიც შენს სამსახურსა და პირად ცხოვრებას უკავშირდება. ეს აპლიკაცია ერთ-ერთი საუკეთესოა ამგვარი სიის შესადგენად, რადგან გამოსაყენებლად მარტივი და საკმაოდ მოსახერხებელია, თანაც მრავალფეროვანი ფუნქციებით გამოირჩევა. მაგალითად, შეხსენებები, პროგრესის მონიტორინგი, პროექტის მართვის ხელსაწყოები.

8. Taiga

პროექტის მართვისთვის ერთ-ერთი საუკეთესო ხელსაწყოა. Taiga-ს გამოყენება უფასოა და ის open source ხელსაწყოს წარმოადგენს. მისი გამოყენებით მარტივად ადევნებ თვალს დავალებებსა თუ არსებულ ხარვეზებს. რაც ამ ხელსაწყოს გამოარჩევს, არის ის, რომ იყენებს Agile framework-ის საუკეთესო პრაქტიკებს. მაგალითად, “epics”, “user story”. თუ შენი გუნდი Agile მეთოდოლოგიას მიყვება ან გაინტერესებს ეს მიდგომა, Taiga კარგი პლატფორმა მის უკეთ გასაცნობად.

9. Motion

Motion-ის AI სისტემა თავად ადგენს შენზე მორგებულ განრიგს. ეს გამოცდილება ასისტენტის ყოლას ჰგავს, რომლის მოვალეობაც შენი შეხვედრების ჩანიშვნასა და სხვადასხვა საქმის შესასრულებლად დროის გამოყოფაა. Motion ადგენს განრიგს შენი კალენდრის მიხედვით, რათა თავისუფალ დროს დავალებებზე იმუშაო. აპლიკაციას შეუძლია შენი პრიორიტეტების განსაზღვრა და სამუშაოს გადადება, რომლებსაც ბოლომდე ვერ ასრულებ.

აპლიკაციები პროდუქტიულობა