გრაფიკული დიზაინი - კურსდამთავრებულთა შთაბეჭდილებები
გრაფიკული დიზაინი დღეს ერთ‑ერთი ყველაზე მნიშვნელოვანი და უნივერსალური მიმართულებაა თანამედროვე სამყაროში. ბიზნესები, სამომხმარებლო ბრენდები, მედია და ტექნოლოგიური სტარტაპები – ყველა ეძებს ვიზუალურ კომუნიკაციას, რომელიც სწორად გადმოსცემს მათ ისტორიას და შექმნის დაუვიწყარ პირველი შთაბეჭდილებას.
დიზაინერი ხდება ის პროფესიონალი, რომელიც იდეას ვიზუალურ ენაზე თარგმნის. სწორედ ამიტომ დიზაინერები ბაზარზე ერთ‑ერთი ყველაზე მოთხოვნადი პროფესიონალები არიან და ამ მიმართულების სწავლა ახალ კარიერულ შესაძლებლობებს გიხსნის.
ბლოგში გაგიზიარებთ გრაფიკული დიზაინის კურსის კურსდამთავრებულების – ელისაბედ (ლიზა) გუნთაიშვილისა და გიორგი ყიფიანის – გამოცდილებასა და შთაბეჭდილებებს.
ლიზა 21 წლის დამწყები დიზაინერია და სწავლობს ინგლისურენოვანი დიზაინის პროგრამაზე საქართველოს ტექნიკურ უნივერსიტეტში. მისთვის განსაკუთრებით საინტერესოა ვიზუალური თხრობა, ბრენდინგი და იდეების ძლიერ ვიზუალურ კონცეფციებად გარდაქმნა.
უყვარს ექსპერიმენტები, რეალურ პროექტებზე მუშაობით სწავლა და ისეთი კრეატიული გარემო, სადაც შეუძლია განვითარება, ეფექტური თანამშრომლობა და საკუთარი უნარების დახვეწა.
ამ ეტაპზე ცდილობს მიიღოს რაც შეიძლება მრავალფეროვანი გამოცდილება, რადგან, მისი თქმით, ახლა იწყებს პროფესიულ გზას, როგორც ახალი შემოქმედი დიზაინის ინდუსტრიაში.
გიორგი ყიფიანი 21 წლისაა და სწავლობს ტექნიკურ უნივერსიტეტში, არქიტექტურის ფაკულტეტის მესამე კურსზე. მონაწილეობა აქვს მიღებული ორ ერასმუსის პროექტში ესპანეთში. რამდენიმე თვე სწავლობდა შვეიცარიაში ხელოვნების სკოლაში და სტუდენტებთან ერთად ჩაატარა TETRIS Festival Küsnacht. ამჟამად გადის Revit-ისა და 3DMAX-ის კურსებს.
გრაფიკული დიზაინის კურსის პარალელურად მონაწილეობდა სხვადასხვა ვორქშოფში, მათ შორის 20-დღიან ლანდშაფტის მოდელირების სემინარში, რომელიც „უბანთან“, ვენეციის IUAV უნივერსიტეტთან და იტალიელ არქიტექტორ რენატო რიცისთან ერთად ჩატარდა.
კურსის გავლის მიზანი
კურსის დაწყებამდე ლიზა ინგლისურენოვანი დიზაინის ფაკულტეტის მესამე კურსის სტუდენტი იყო. მისი აზრით, მრავალფეროვანი გამოცდილება და სხვადასხვა გარემოში სწავლა მნიშვნელოვნად ავითარებს ადამიანს და უფრო ფართო მსოფლმხედველობის ჩამოყალიბებაში ეხმარება.
ლიზას ესმოდა, რომ სამთვიანი ინტენსიური პროგრამა უნივერსიტეტის თეორიულ სწავლებასთან სრულიად განსხვავებულ გამოცდილებას მისცემდა. კურსის მთავარ მიზნად დაისახა საკუთარი კრეატიული და კომუნიკაციის უნარების გაღრმავება, პრაქტიკული გამოცდილების მიღება და დიზაინის სფეროში საკუთარი შესაძლებლობების ახალი პერსპექტივით აღმოჩენა.
გიორგის თქმით, მან კურსი facebook-ზე ჯიტას სოციალური გვერდის რეკლამით აღმოაჩინა. ის არქიტექტურას სწავლობს და ხშირად სჭირდება Adobe Illustrator-ისა და Photoshop-ის გამოყენება გეგმების, პრეზენტაციების და კოლაჟებისთვის. ამბობს, რომ მანამდე მხოლოდ Canva-ს იყენებდა, რაც არ აძლევდა სრულყოფილად საკუთარი იდეების განხორციელების საშუალებას და ხშირად უკმაყოფილო რჩებოდა შედეგით.
Revit-ისა და 3ds Max-ის პარალელურად გიორგის არასდროს ჰქონდა დრო, რომ ილუსტრატორი და ფოტოშოპი თვითონ ესწავლა. კურსზე ის სრულიად დამწყების სტატუსით მივიდა. იცოდა, რომ გრაფიკული დიზაინი განსაკუთრებით ბოლო პერიოდში გახდა მოთხოვნადი და პოპულარული მიმართულება, თუმცა ზუსტად არ ჰქონდა გააზრებული, რას მოიცავდა ეს პროფესია და ვინ იყო გრაფიკული დიზაინერი.
რატომ commschool?
კურსის შერჩევის პროცესში ლიზა სხვადასხვა საგანმანათლებლო პლატფორმას ეცნობოდა, თუმცა commschool პირველად სოციალურ მედიის სივრცეში აღმოაჩინა. თავიდანვე მოიხიბლა commschool-ის ვიზუალური სტილით, კომუნიკაციის ტონითა და ბრენდინგით – ფაქტორებით, რომლებიც მისთვის, როგორც დიზაინის სტუდენტისთვის, განსაკუთრებულ მნიშვნელობას ატარებდა.
მისი აზრით, როდესაც საგანმანათლებლო სივრცეს ძლიერი ვიზუალური იდენტობა და ხარისხიანი კომუნიკაცია აქვს, ეს მეტყველებს იმაზე, რომ მის გუნდს ნამდვილად კარგად ესმის დიზაინის მნიშვნელობა. ბევრი სხვა დაწესებულება, თუნდაც დიზაინის მიმართულებით, არ ფლობს გამართულ ბრენდინგს, რის გამოც ლიზა მალევე მიხვდა, რომ commschool იყო ადგილი, სადაც ნამდვილად იციან, რასაც ასწავლიან.
პირველი, რამაც გიორგის ყურადღებას მიიპყრო, იყო commschool-ის გამართული ლოგო და ვიზუალურად მიმზიდველი, პროფესიონალურად აწყობილი ვებგვერდი. თუმცა გადამწყვეტი მაინც სტუდენტების შეფასებები და რევიუები გახდა – სწორედ მათი დამსახურებით დარწმუნდა, რომ სწორ გარემოში მოხვდა და მიიღებდა ხარისხიან, რეალურად გამოსადეგ განათლებას.
გამოცდილება და შთაბეჭდილებები
ლიზასთვის კურსზე სწავლა ერთდროულად სახალისო და საგანმანათლებლო გამოცდილება აღმოჩნდა. მიუხედავად იმისა, რომ უნივერსიტეტში უკვე სამი წლის აკადემიური ცოდნა ჰქონდა, ამ კურსზე აღმოაჩინა უამრავი ახალი რამ, რაც მისთვის აქამდე უცნობი იყო. პროგრამამ სრულად გაამართლა მისი მოლოდინები.
"ჩემთვის ყველაზე ღირებული ნაწილი იყო რეალური და კონსტრუქციული უკუკავშირი, რაც დიზაინერის განვითარებისთვის უმნიშვნელოვანესია, ასევე ჯგუფური დისკუსიები, სადაც ვისწავლე როგორ მივიღო და გავაზიარო კრიტიკა."
ლიზას სჯერა, რომ მიღებული გამოცდილება მნიშვნელოვან როლს ითამაშებს მის, როგორც პროფესიულ, ასევე პიროვნულ განვითარებაში და დაეხმარება ჩამოყალიბდეს უფრო მრავალფეროვან, მოქნილ და ძლიერ დიზაინერად.
გიორგისთვის კურსში მონაწილეობა ერთ-ერთი ყველაზე სასიამოვნო და მნიშვნელოვანი გამოცდილება იყო, რომელმაც მნიშვნელოვნად გადააჭარბა მის მოლოდინებს. მისი თქმით, ჯგუფში იყვნენ სტუდენტები, რომლებსაც უკვე ჰქონდათ გარკვეული ცოდნა როგორც გრაფიკულ დიზაინში, ისე პროგრამებში. გიორგი ამბობს, რომ ლექტორის მხარდაჭერის წყალობით გამოცდილ წევრებთან ერთად მუშაობა მეტად საინტერესო გახდა, რადგან ისინი ხშირად უზიარებდნენ ჯგუფს ახალ და პრაქტიკულ ინფორმაციას.
გიორგი გვიყვება, რომ პროგრამებთან მუშაობა თავდაპირველად რთულად ეჩვენებოდა, მაგრამ ლექტორის მუდმივი მხარდაჭერის წყალობით, პროგრამებს სწრაფადვე დაეუფლა. დღეს ის უკვე დამოუკიდებლად აგრძელებს სწავლას, მიღებულ ცოდნას აქტიურად იყენებს თავის პროექტებში და ხშირად მეგობრებსაც უზიარებს ახალ ინფორმაციებს.
კურსის დასრულების შემდეგ გიორგის სურს, როგორც დამწყებმა დიზაინერმა, გამოსცადოს თავი სხვადასხვა კომპანიაში სტაჟიორის პოზიციაზე, რათა კიდევ უფრო მეტი გამოცდილება დააგროვოს.
ფინალური პროექტი
ფინალური პროექტის თემის არჩევისას ლექტორის, მარიამ გოგიაშვილის, რეკომენდაცია იყო – სტუდენტებს აერჩიათ ისეთი ადგილი ან ბრენდი, რომელსაც კარგად იცნობდა და რომელიც პირადად მოსწონდა. ეს მიდგომა ლიზასთვის ლოგიკური და შთამბეჭდავი აღმოჩნდა, რადგან თვლიდა, რომ ნაცნობ ბრენდთან მუშაობა აადვილებს ემოციურ ჩართულობასა და ამაღლებს პასუხისმგებლობის შეგრძნებას. სწორედ ამიტომ, რებრენდინგისთვის მან ადგილობრივი სანაყინე „სპაგულეტი“ აირჩია – ადგილი, რომელსაც პირადი გამოცდილებით იცნობდა და თვლიდა, რომ ვიზუალურად და კომუნიკაციის მხრივ გაუმჯობესების პოტენციალი ჰქონდა.
ლიზა ამბობს, რომ მთლიანი პროცესის განმავლობაში იგი მუდმივად იღებდა კონსტრუქციულ უკუკავშირს:
"პროცესის განმავლობაში მუდმივად ვიღებდი კონსტრუქციულ უკუკავშირს, რაც მეხმარებოდა იდეის დახვეწასა და პროექტის სწორი მიმართულებით განვითარებაში. ყოველი სესიის განმავლობაში პროექტებს ჯგუფურად განვიხილავდით, რაც არა მხოლოდ ჩემი ნამუშევრის გაუმჯობესებაში დამეხმარა, არამედ სხვა მონაწილეების პროცესებზე დაკვირვებით და ერთობლივი განხილვებითაც ბევრი ახალი რამ მასწავლა."
ლიზას თქმით, მან მიღებული კრიტიკა გამოიყენა არა მხოლოდ დიზაინის გასაუმჯობესებლად, არამედ საბოლოო პრეზენტაციის – მათ შორის Behance-ის პროექტის სტრუქტურისა და თხრობის ჩამოსაყალიბებლად. ამ პროცესმა ასწავლა, როგორ იმუშაოს ეტაპობრივად, როგორ მიიღოს უკუკავშირი სწორად და როგორ აქციოს ის პროექტის განვითარების ინსტრუმენტად.
გიორგი ამბობს, რომ ფინალურ პროექტზე ბევრი იფიქრა, თუ რომელი ბრენდი ამერჩია.
ერთ დღეს არქიტექტურულ წიგნს ეძებდა და მოუწია „პროსპეროს წიგნებში“ შევლა. გიორგიმ ჩათვალა, რომ ბრენდს ნამდვილად სჭირდებოდა რებრენდინგი, მაგრამ არ იცოდა რამდენად გაართმევდა ასეთ რთულ დავალებას თავს. მიუხედავად ამისა, იგი ამ გამოწვევას დიდი შემართებით შეეჭიდა.
გიორგის თქმით, ბრენდი 1999 წლიდან არსებობს და კავკასიაში პირველი ინგლისურენოვანი წიგნების მაღაზია და კაფე იყო – ამიტომ მისი რებრენდინგი განსაკუთრებით პასუხისმგებლიანი ამოცანა იყო, თანაც მას ყველა ასაკობრივი ჯგუფი იცნობდა.
გიორგის აზრით, პროექტზე მუშაობისას ლექტორი მუდმივად ცდილობდა მასთვის სწორი, მიზანმიმართული და ეფექტური უკუკავშირი მიეცა:
"ფინალურ პროექტზე მუშაობის დროს ყოველ ეტაპზე უკუკავშირს ვიღებდი მარიამისგან და ასევე სტუდენტებისგანაც, ასევე დროის მენეჯმენტში ძალიან დამეხმარა მარიამის შედგენილი ცხრილი, რომელიც კვირეების მიხედვით იყო განაწილებული, სადაც ყოველი ლექციისთვის ვტვირთავდი ფინალური პროექტის ახალ ვარინტებს."
პროსპეროს წიგნებზე“ მუშაობა გიორგისთვის პირველი ასეთი მასშტაბური გამოცდილება იყო და ამ პროცესმა არა მხოლოდ ტექნიკური უნარები, არამედ დიზაინერული ხედვაც მნიშვნელოვნად განუვითარა.
რჩევა მომავალ სტუდენტებს
ლიზა მომავალ სტუდენტებს ურჩევს, კურსზე მოსვლისას იყვნენ მაქსიმალურად გახსნილები ახალი გამოცდილებისა და კრიტიკის მიმართ და არ შეუშინდნენ კითხვების დასმას.
მისი აზრით, ყველაზე მნიშვნელოვანი სწორედ აქტიური ჩართულობაა – უკუკავშირის მიღება, ჯგუფური დისკუსიები და პროცესში საკუთარი აზრის ხმამაღლა ფორმულირება. ეს ყოველივე ეხმარება არა მხოლოდ ტექნიკური, არამედ კომუნიკაციისა და კრიტიკული აზროვნების უნარების განვითარებაში.
ლიზა ასევე მნიშვნელოვანად მიიჩნევს ფინალური პროექტისთვის ისეთი თემის ან ბრენდის არჩევას, რომელიც სტუდენტს ნამდვილად აინტერესებს. მისი თქმით, ეს მუშაობას ბევრად უფრო საინტერესოს, გააზრებულს და შედეგიანს ხდის.
მისი შეხედულებით, თუ სტუდენტი მზად არის იმუშაოს საკუთარ თავზე, მოუსმინოს განსხვავებულ ხედვებს და მუდმივად განავითაროს საკუთარი სტილი და აზროვნება, ეს კურსი ნამდვილად დაეხმარება როგორც პროფესიულ, ასევე პიროვნულ ზრდაში.
გიორგი ყველას, ვისაც გრაფიკული დიზაინი აინტერესებს, commschool-ში სწავლებას ურჩევს.
მისი თქმით, სტუდენტებს აქ სრული გარანტია ექნებათ, რომ მიიღებენ ხარისხიან, პრაქტიკულად გამოსადეგ განათლებას და იმუშავებენ კომფორტულ გარემოში.
იგი აღნიშნავს, რომ გრაფიკული დიზაინი სწრაფად მზარდი და პოპულარული სფეროა, სადაც მოთხოვნა ყოველდღიურად მატულობს. სწორედ ამიტომ, გიორგის აზრით, ყველას, ვისაც ამ მიმართულებით სურს განვითარება, commschool-ის გრაფიკული დიზაინის კურსი აუცილებლად უნდა გაითვალისწინოს.
გამოცდილება და კარიერული ხედვა
ლიზასთვის კურსი ძალიან დადებითი გამოცდილება აღმოჩნდა.
მისი თქმით, როგორც ლექტორის, ისე commschool-ის მიდგომა გამოირჩეოდა ყურადღებით, პროფესიონალიზმითა და სტუდენტზე ორიენტირებული დამოკიდებულებით. განსაკუთრებით მოსწონდა ღია კომუნიკაცია, კონსტრუქციული უკუკავშირი და ის კომფორტული გარემო, სადაც თავისუფლად შეიძლებოდა იდეების გაზიარება. მისი თქმით, კურსი პრაქტიკაზე, დისკუსიებზე და გამოცდილების გაცვლაზე იყო დაფუძნებული, რაც მნიშვნელოვან როლს თამაშობდა მის დიზაინერულ განვითარებაში.
კურსის დასრულების შემდეგ ლიზა კარიერულ განვითარებას ხედავს ეტაპობრივ, პრაქტიკაზე დაფუძნებულ პროცესად. ის გეგმავს მიღებული ცოდნის გამოყენებას რეალურ პროექტებში, პორტფოლიოს გაძლიერებას და ისეთ გარემოში მუშაობას, სადაც მუდმივად შეეძლება ზრდა, სწავლა და ექსპერიმენტი.
მომავალში ლიზას სურს კონცეპტუალური აზროვნებისა და ვიზუალური თხრობის გაღრმავება. ასევე სურს გაიუმჯობესოს კომუნიკაციისა და პრეზენტაციის უნარები, რათა უკეთ წარმოაჩინოს საკუთარი ნამუშევრები. მისთვის მნიშვნელოვანია პრაქტიკულ გამოცდილებაზე დაფუძნებული უნარები – გუნდურობა, უკუკავშირის სწორად გამოყენება და სხვადასხვა ხედვასთან ადაპტაცია.
გიორგის ამბობს, რომ კურსით ძალიან კმაყოფილია. განსაკუთრებით გამოარჩევს,ლექტორთან, მარიამთან მუშაობას, რომლის გამოცდილება, რჩევები და პროფესიული მიდგომა მისთვის დიდი მოტივაცია იყო.
გიორგის თქმით, ლექციები იმდენად საინტერესო იყო, რომ ხშირად დაგეგმილ დროს აღემატებოდა. გარდა ამისა, კმაყოფილია commschool-ის ადმინისტრაციით, რომელიც ყოველთვის დროულად აწვდიდა ინფორმაციას და უზრუნველყოფდა კომფორტულ სასწავლო პროცესს.
გიორგი ამ სფეროში საკუთარ მომავალს ხედავს, თუმცა თავს ჯერ ისევ დამწყებად მიიჩნევს. ის გეგმავს სტაჟირების გავლას, რათა პრაქტიკული გამოცდილება შეიძინოს და მეტი თვითდაჯერებულობა მოიპოვოს. მას სურს ტექნიკური ცოდნის გაღრმავება, პროგრამებში უფრო თავისუფლად მუშაობა და საკუთარი პროექტების წარმოჩენაში მეტი თავდაჯერებულობა.
გრაფიკული დიზაინის კურსი
commschool-ის გრაფიკული დიზაინის კურსი განკუთვნილია მათთვის, ვინც ნულიდან საფუძვლიანად სურს გრაფიკული დიზაინის შესწავლა. პროგრამა მოიცავს სრულ პროცესს — ბრიფის გაგებიდან და მუდბორდის შექმნიდან დაწყებული, ლოგოს სკეჩირებითა და სხვადასხვა ვიზუალური მასალის დამზადებით დასრულებული.
სწავლება პრაქტიკაზეა აგებული და ორიენტირებულია Adobe Photoshop-ისა და Adobe Illustrator-ის პროფესიულ გამოყენებაზე. სტუდენტები თითოეულ ლექციაზე ქმნიან რეალურ ნამუშევრებს, ხოლო კურსის ბოლოს ამზადებენ სრულფასოვან ინდივიდუალურ პროექტს საკუთარი პორტფოლიოსთვის.
კურსის წარმატებით დასრულების შემდეგ მონაწილეები იღებენ ორენოვან სერტიფიკატს და უერთდებიან commschool-ის Alumni Club-ს, სადაც მათ ელოდებათ პროფესიული მხარდაჭერა, ახალი კონტაქტები და კარიერული შესაძლებლობები.
თუ მზად ხარ, რომ შენი ნიჭი რეალურ შესაძლებლობად აქციო – commschool-ის გრაფიკული დიზაინის კურსი შენთვისაა!
შესაძლოა გაინტერესებდეს
საშუალო
საშუალო
საშუალო
შესვლა Google-ით
შესვლა Facebook-ით