გაიცანი Python-ის კურსის ლექტორი - ბექა ბიტარაშვილი

გაიცანი ლექტორი

დღეს, როცა ტექნოლოგიები ყოველდღიურად ცვლიან ჩვენს ცხოვრებას, პროგრამირება აღარ არის მხოლოდ დეველოპერების საქმე – ის ხდება უნივერსალური ენა, რომელსაც იყენებენ მეცნიერები, დიზაინერები, მარკეტოლოგები და მეწარმეები. ამ ენებს შორის კი Python გამორჩეულია თავისი სიმარტივით, მოქნილობით და მრავალმხრივი გამოყენებით.

თუ შენც გსურს, გაიგო როგორ მუშაობს ხელოვნური ინტელექტი, როგორ იქმნება ვებსაიტები, ან როგორ ხდება მონაცემების ანალიზი – Python-ის შესწავლა შესანიშნავი დასაწყისია.

ამ ბლოგში გაგაცნობთ, ბექა ბიტარაშვილს, commschool-ის Python-ის კურსის ლექტორს, რომელიც მოგვიყვება პითონის ენაზე, მის შესაძლებლობებზე და იმ გზაზე, რომელსაც ახალბედა პროგრამისტები ამ კურსის ფარგლებში გაივლიან.

ბექა ბიტარაშვილი ტექნოლოგიური სფეროს ექსპერტია, რომელსაც მრავალწლიანი გამოცდილება აქვს პროგრამირებასა და ტექნოლოგიური გადაწყვეტილებების განვითარებაში. ბოლო ხუთი წლის განმავლობაში აქტიურად არის ჩართული საგანმანათლებლო საქმიანობაში, სადაც ასწავლის ისეთ თემებს, როგორებიცაა Python, ავტომატიზაცია Python-ის გამოყენებით, ვებ-ფრემვორკები Flask და Django.

ის CODEMAMA-ს დამფუძნებელია, ინოვაციური პლატფორმის, რომელიც მიზნად ისახავს ტექნიკური სფეროთი დაინტერესებული ადამიანების განვითარებას. პლატფორმა აერთიანებს საგანმანათლებლო რესურსებს, პრაქტიკულ პროექტებს და კონკურსებს, როგორიცაა ჰაკათონები და ოლიმპიადები, რაც მონაწილეებს აძლევს შესაძლებლობას რეალურ გამოწვევებზე მუშაობით გაიღრმაონ ცოდნა და უნარები.

პითონის აქტუალურობა და მოთხოვნა თანამედროვე ბაზარზე

Python დღეს ერთ-ერთი ყველაზე პოპულარული და მოთხოვნადი პროგრამირების ენაა. მისი წარმატება განპირობებულია სიმარტივით, მრავალფეროვნებით და ძლიერი ეკოსისტემით — ბიბლიოთეკებითა და ფრეიმვორქებით, რომლებიც სხვადასხვა სფეროში გამოიყენება.

Python აქტიურად გამოიყენება:

მონაცემთა მეცნიერებაში
ხელოვნურ ინტელექტსა და მანქანურ სწავლაში
ვებ-დეველოპმენტში
სისტემების ავტომატიზაციასა და სკრიპტინგში
სამეცნიერო და გამოთვლით სამუშაოებში

პითონი წლების განმავლობაში რჩება ერთ-ერთ ყველაზე მოთხოვნად პროგრამირების ენად. მისი მრავალფეროვნება და მარტივი სტრუქტურა იდეალური არჩევანია დამწყებთათვის. თანამედროვე ტექნოლოგიურ ბაზარზე პითონის პოპულარობა განსაკუთრებით მაღალია, რაც AI-ის, მანქანური სწავლებისა და მონაცემთა ანალიტიკის სწრაფ განვითარებას უკავშირდება. მოსალოდნელია, რომ ეს ტენდენცია მომავალშიც გაგრძელდება.

"პითონის აქტუალურობა და მოთხოვნა თანამედროვე ტექნოლოგიურ ბაზარზე ძალიან მაღალია და მოსალოდნელია, რომ ეს ტენდენცია გაგრძელდება AI/ML და მონაცემთა ანალიტიკის სფეროების განვითარების ფონზე."

ბექა ბიტარაშვილი

პითონის შესაძლებლობები

პითონი მრავალმხრივი და მძლავრი პროგრამირების ენაა, რომელიც ფართოდ გამოიყენება სხვადასხვა ტექნოლოგიურ სფეროში:

მონაცემთა მეცნიერება, ანალიტიკა და მანქანური სწავლება
პითონი განსაკუთრებით პოპულარულია მონაცემთა დამუშავებასა და ანალიტიკაში. ბიბლიოთეკები, როგორიცაა NumPy და Pandas, უზრუნველყოფს ეფექტურ მონაცემთა ანალიზს. Scikit-learn გამოიყენება მანქანური სწავლების ალგორითმებისთვის, ხოლო ღრმა ანალიტიკისთვის ფართოდ გამოიყენება TensorFlow და PyTorch. მონაცემთა ვიზუალიზაციისთვის კი ხშირად მიმართავენ Matplotlib-სა და Seaborn-ს. ბუნებრივი ენის დამუშავების მიმართულებით კი აქტიურად გამოიყენება NLTK.
ვებ-დეველოპმენტი
პითონი ეფექტურია ვებ-დეველოპმენტშიც. მასშტაბური ბექ-ენდ სისტემებისთვის გამოიყენება Django, ხოლო მიკრო და საშუალო გადაწყვეტებისთვის — Flask. თანამედროვე API-ების შესაქმნელად კი პოპულარულია FastAPI.
ავტომატიზაცია
პითონი იდეალურია ავტომატიზაციისთვის. Selenium გამოიყენება ტესტირების ავტომატიზაციისთვის, ხოლო ვებ-სკრეიფინგისთვის — BeautifulSoup და Scrapy.
პროგრამული უზრუნველყოფის შემუშავება
გრაფიკული ინტერფეისის მქონე აპლიკაციების შესაქმნელად პითონი გვთავაზობს ბიბლიოთეკებს, როგორიცაა Tkinter და Kivy.

5 მიზეზი რატომ უნდა ისწავლო პითონი

მარტივი და წაკითხვადი სინტაქსი
პითონის კოდი ძალიან ჰგავს ინგლისურ ენას, რაც მას იდეალურ პირველ ენად აქცევს დამწყებთათვის.
მრავალმხრივი გამოყენება
პითონი გამოიყენება ვებ დეველოპმენტში (Django, Flask), ავტომატიზაციაში და სამეცნიერო გამოთვლებში.
მაღალი მოთხოვნა და ანაზღაურება
პითონი მუდმივად ტოპ 3 ყველაზე მოთხოვნად ენას შორისაა და სთავაზობს კონკურენტულ ანაზღაურებას.
დიდი და აქტიური საზოგადოება
პრობლემების გადაჭრა და სწავლის პროცესი უფრო მარტივია, რადგან უამრავი რესურსი და მხარდაჭერაა ხელმისაწვდომი.
ლიდერობა AI/ML და მონაცემთა ანალიტიკაში
ხელოვნური ინტელექტისა და მანქანური სწავლების სფეროში პითონი პრაქტიკულად შეუცვლელია.

ყველაზე ხშირი გამოწვევები

მიუხედავად იმისა, რომ პითონის ძირითადი სინტაქსი მარტივი და წაკითხვადია, მისი სიღრმისეული გაგება ხშირად სირთულეებთან არის დაკავშირებული. განსაკუთრებით რთულია ობიექტზე ორიენტირებული პროგრამირება (OOP), მონაცემთა სტრუქტურები, ალგორითმები და ასინქრონული კოდის წერა. სწორედ ამიტომ, მნიშვნელოვანია, რომ დამწყებმა პროგრამისტმა არ გამოტოვოს თეორიული საფუძვლების შესწავლა და საკმარისი დრო დაუთმოს ისეთ თემებს, როგორიცაა კლასები, ობიექტები, მემკვიდრეობა და რთული ალგორითმები.

სასარგებლოა კოდირების სავარჯიშოების გამოყენება, რომლებიც კონკრეტულად ამ კონცეფციებზეა ორიენტირებული. პითონის ეკოსისტემა ძალიან ფართოა და დამწყებები ხშირად იბნევიან ბიბლიოთეკების მრავალფეროვნებაში. სწორი მიდგომაა, თუ თავიდანვე განისაზღვრება სასურველი მიმართულება (მაგალითად, ვებ დეველოპმენტი, მონაცემთა ანალიტიკა ან ავტომატიზაცია) და შეირჩევა 2-3 ძირითადი ბიბლიოთეკა, რომელთა საფუძვლიანად შესწავლა დაეხმარება სტაბილურ განვითარებაში.

გარდა ამისა, მხოლოდ ვიდეო გაკვეთილების ყურება ან კოდის კითხვა საკმარისი არ არის. პროგრამირება პრაქტიკული უნარია, რომელიც მოითხოვს აქტიურ ჩართულობას. ყოველი ახალი თემის შესწავლის შემდეგ რეკომენდებულია საკუთარი კოდის წერა და მცირე პირადი პროექტების შექმნა — ეს გზა ყველაზე ეფექტურად ამყარებს ცოდნას და ავითარებს უნარებს.

"რეკომენდირებულია, რომ ავიღოთ 2-3 ბიბლიოთეკა და ვისწავლოთ მაქსიმალურად საფუძვლიანად, ამის შემდეგ შეიძლება სხვა ფრეიმვორქებზე გადასვლა."

ბექა ბიტარაშვილი

რა ტექნოლოგიებს ისწავლიან სტუდენტები კურსის განმავლობაში

პითონის კურსის ფარგლებში სტუდენტები ეტაპობრივად დაეუფლებიან როგორც ტექნიკურ უნარებს, ისე პრაქტიკულ მიდგომებს, რაც მათ დამოუკიდებელ დეველოპერებად ჩამოყალიბებაში დაეხმარება. კურსი მოიცავს შემდეგ თემებს:

– IDE-ს (Pycharm) სამუშაო გარემოს გამართვა & პროექტებზე მუშაობა;

– პროექტის მართვა ვერსიის კონტროლის გამოყენებით;

– პროექტის სუფთად & ლოგიკურად ორგანიზება;

– Python ყველაზე პოპულარული web framework-ების გამოყენება;

– Python Back-end Deployment & რეკომენდირებული მიდგომების გამოყენება;

– Python პროექტის ფუნქციონალის ტესტირება;

– OOP მიდგომების გამოყენება ამოცანების გადასაწყვეტად;

– Python პროექტში პაკეტების მართვა & მუშაობა;

– Python პოპულარული open-source პაკეტების გამოყენება;

– Python-ის გამოყენებით მონაცემთა ბაზებთან მუშაობა;

– Python-ის გამოყენებით სერვისებთან ინტეგრაცია / ინტერაქცია;

– Python-ის Framework-ების (Flask, FasAPI) დამოუკიდებლად გამოყენება;

– Python-ის პროგრამირების ენის გამოყენებით შემდგომი კარიერული განვითარება რამდენიმე მიმართულებით (web development, data science, data analytics, web scraping).

კურსის შესახებ

Python-ის კურსი აგებულია პრაქტიკულ სწავლებაზე, რაც გულისხმობს როგორც თეორიული მასალის გააზრებას, ისე აქტიურ მუშაობას დავალებებსა და სავარჯიშოებზე. სტუდენტები კურსის განმავლობაში იმუშავებენ ინდივიდუალურ პროექტზე, რაც დაეხმარებათ რეალური გამოცდილების დაგროვებაში.

გარდა ტექნიკური უნარების განვითარებისა, პროგრამა მოიცავს კარიერული დაგეგმვის კონსულტაციებსა და რეკომენდაციებს. კურსის წარმატებით დასრულების შემდეგ მონაწილეებს ექნებათ შესაძლებლობა განავითარონ კარიერა სხვადასხვა მიმართულებით და მოიძიონ დასაქმების რეალური შესაძლებლობები ტექნოლოგიურ სფეროში.

გადადგი პირველი ნაბიჯი ტექნოლოგიების სამყაროში, შეერთდი commschool-ის Python-ის კურსს და გახდი იმ ცვლილების ნაწილი, რომელსაც ტექნოლოგია ქმნის.