მსოფლიოს წამყვანი ბრენდები უკვე დიდი ხანია იყენებენ ხელოვნურ ინტელექტს (AI) თავიანთი საქმიანობის სხვადასხვა ეტაპზე, რაც აძლიერებს მათ კონკურენტულ უპირატესობასა და მომხმარებელთან ურთიერთობის ხარისხს.

მაგალითად, სტრიმინგ სერვისები ქმნიან პერსონალურ რეკომენდაციებს მომხმარებლის ისტორიის საფუძველზე, რაც ზრდის პლატფორმაზე გატარებული დროის მაჩვენებელს. ამ კუთხით აღსანიშნავია Netflix, რომელიც მომხმარებლის ნახვის ისტორიის საფუძველზე ადგენს არა მხოლოდ რეკომენდაციებს, არამედ აყალიბებს მათი ვიზუალური წარმოდგენის ფორმას, რათა გაზარდოს მომხარებლის ინტერესის ალბათობა. ასევე, Spotify იყენებს ხელოვნურ ინტელექტს ინდივიდუალური მუსიკალური გემოვნების ანალიზისთვის და ქმნის პერსონალიზებულ პლეილისტებსა და რჩევებს, რაც ზრდის პლატფორმისადმი ერთგულებას.

ელექტრონული კომერციის გიგანტები პროგნოზირებენ შეკვეთებს, მართავენ მარაგებს და ამარტივებენ მიწოდების ჯაჭვს, რის შედეგადაც მომხმარებელი იმავე დღეს იღებს სასურველ პროდუქტს. ერთ-ერთი საუკეთესო მაგალითია Amazon, რომელიც იყენებს AI-ს გაყიდვების ანალიტიკისთვის, წინასწარ განსაზღვრავს პროდუქტის მოთხოვნას და მარაგებს გონივრულად ანაწილებს სხვადასხვა ლოკაციაზე, რაც Same-day Delivery სერვისის ეფექტიანობას მნიშვნელოვნად ზრდის.

სილამაზის ინდუსტრიაშიც ხელოვნური ინტელექტი გამოიყენება მომხმარებელთა ქცევისა და პრეფერენციების ღრმა ანალიზისთვის. მაგალითად, კომპანია Sephora თავის ერთ-ერთ წამყვან ლოიალურობის პროგრამაში – Beauty Insider – იყენებს AI-ს 34 მილიონზე მეტი მომხმარებლის სეგმენტირებისა და მათთვის ინდივიდუალურად მორგებული შეთავაზებების შესაქმნელად. ეს მიდგომა ხელს უწყობს არა მხოლოდ გაყიდვების ზრდას, არამედ მომხმარებელთა ერთგულების განმტკიცებას.

ამრიგად, AI-ს ინტეგრაცია ბიზნესპროცესებში საშუალებას აძლევს კომპანიებს, მიიღონ სწრაფი და მონაცემებზე დაფუძნებული გადაწყვეტილებები, რაც აუმჯობესებს როგორც მომხმარებლის გამოცდილებას, ისე კომპანიის ოპერაციულ ეფექტიანობას.